ԳՈՐԾՈՂ ԱՍՏՎԱԾ

Զորությունը ձեր պատկերացրածի պես մի համապարփակ ուժ չէ, որ տագնապի ժամին ձեզ օգնության եք կանչում: Զորությունը - պարզապես նույն Ինքը Գործող Աստվածն է:

Երբ Իմ հետեւորդներից որեւէ մեկը - անգամ նրանցից ամենատկարը - թույլ է տալիս, որ Աստված գործի իր միջոցով, այդ ժամանակ նրա արած բոլոր գործերը կատարյալ են լինում:

Այս մտածումն ունեցիր հատկապես այն օրերին, երբ անելիքներ առանձնապես չունես: Հասկացիր, ջանա շարունակ տեսնել, որ դու չես հեղինակը Հզոր Գործերի, այլ քո մեջ գործող Աստվածային Հոգին է այդ ամենի կատարողը: Ինչպես արդեն ասել եմ, քո միակ անելիքը պետք է լինի քո անձը եւ քո Ես-ը սպանելն ու հեռու վտարելը: Ընտիր ուրագը վարպետի ձեռքում շատ որակով գործեր կկարողանա կատարել: Այդ նույն ուրագը անվարժ տղեկի ձեռքում ոչ մի բան չի կարող անել: Ուրեմն հիշիր, որ ոչ թե գործիքը, այլ այն օգտագործող ձեռքն է արդյունք տվողը:

Հիշիր նաեւ, որ ոչ մի օր չպետք է կորած համարել, եթե այդ օրը մի որեւէ Հոգեւոր Ճշմարտություն ավելի պարզ ու հստակ է դարձել քեզ համար: Ոչ մի օր չի կարող կորած համարվել, եթե այդ օրը տրամադրվել է, որ Ես գործածեմ: Իմ այդ գործածությունը կարող է եւ չտեսնվի քո կողմից, բայց այդ ինձ թող: Դու միայն բնակվիր Իմ մեջ, եւ թող, որ`Ես էլ քո մեջ օթեւանեմ, որպեսզի կարողանաս առատ պտուղներ տալ: Պտուղը ճյուղերի գործը չէ. թեեւ ճյուղերը հպարտորեն նրանց կրում են իրենց վրա: Պտուղը - Որթատունկի Գործն է, որ իր կենսահյութը արմատներից շարունակ ճյուղերին է մղում: Ես Որթատունկն Եմ, դուք` ճյուղերը: